Трамп Цагаан ордонд 3,4 сая ам.долларын засвар хийлгэж байна

Бичсэн:munkhbat
2017/08/30/, 11:20

Наймдугаар сард Цагаан ордон их засварт ороод АНУ-ын Ерөнхийлөгч амралттай байгаа гэнэ.

АНУ-ын Ерөнхийлөгч өнгөрсөн долоо хоногт ээлжит амралтаасаа Цагаан ордондоо эргэн ирэхэд баруун жигүүрийнх нь засвар дуусаагүй байв. Цагаан ордны засварт нийт 3,4 сая ам.доллар зарцуулж буй аж. Хэдийгээр АНУ-ын Ерөнхийлөгч бүр Цагаан ордны засварт өөрийн биеэр оролцдог ч хэвлэлийнхэнд Трампын үйлдэл бусдаас илүү сонирхолтой байгаа юм. Хэвлэлүүд Трампын үйлдэл бүрийг бараг микроскопоор харж, шинжиж байна. Тиймээс ханын цаас, хивс солих нь хүртэл багагүй сенсааци дагуулж буй. АНУ-ын Ерөнхийлөгч зууван танхимынхаа ханын цаасыг өөрөө сонгосон бол Рузвельтын өрөөнд алтадсан бүргэдийн баримал авч байрлуулжээ. Мөн Цагаан ордны хивс, хивсэнцрийг солиход 1 сая ам.доллар зарцуулсан гээд засвараас үүдсэн багагүй хэл аманд өртөөд байгаа юм.

Цагаан ордны хэвлэлийн нарийн бичгийн даргын орлогч Линдси Уолтерс "Энэ удаагийн засвар зөвхөн Трампын хүслээр хийгдэж байгаа юм биш. Обама Ерөнхийлөгчийг суудлаа өгөхөөс өмнө төлөвлөгдсөн байсан” гэдгийг албан ёсоор мэдээлсэн байна. Түүний хэлснээр "Цагаан ордны баруун жигүүрийн агааржуулалтын систем бүрэн ажиллахгүй байгаа аж. Энэхүү агааржуулах системийг 81 жилийн өмнө суурилуулсан бөгөөд 27 жилийн тэртээ сүүлийн засварыг хийсэн. Мөн өмнөд хэсгийн зүлэг болоод зарим өрөөнүүдэд 64 жилийн турш шинэчлэл засварын ажил хийгдээгүй” гэжээ.

Сэтгүүлчид Уолтерсээс яагаад Ерөнхийлөгч Трамп Эрүүл мэндийн хуулийг батлах гэж яаравчлахын оронд амралтаа аваад явсныг тодруулахад "хэрвээ агааржуулагчгүй бол Цагаан ордонд ажиллах ямар ч боломжгүй. Баруун жигүүрийн агааржуулагчийг засварлахын тулд хоёр долоо хоног шаардлагатай байсан тул Цагаан ордонд Ерөнхийлөгч болоод бусад ажилчид ч ажиллаагүй. Учир нь зуны өдрүүдэд Вашингтонд 38 градус хүртэл халдгийг та бүхэн мэднэ биз дээ” гэсэн байна.

Цагаан ордонг XVIII зууны сүүлээр барьсан бөгөөд 240 гаруй жил болж байгаа гэж үздэг. 1817 онд галд өртөж, 3 жилийн турш засвар хийсэн байдаг. Хэдийгээр бүх Ерөнхийлөгч болоод тэргүүн хатагтай нар Цагаан ордныг шинэчлэн засварлахыг хүсч, өөр өөрсдийн тавилгыг авчирч байршуулдаг ч Цагаан ордон АНУ-ын төрийн бэлгэдэл болон хуучин өнгө төрхөө хадгалан оршсоор буй юм.
Цагаан ордны хэвлэлийн төлөөлөгчийн мэдээлснээр агааржуулагч болоод бусад тоног төхөөрөмжийг солиход 1,965 сая ам.доллар зарцуулсан бөгөөд энэ нь Обама Ерөнхийлөгчийн үед төсөвлөгдсөн зардал байсан гэнэ. Мөн зарим зураг болоод тааз бусад сэргээн засварлах ажилд 275 мянган ам.доллар, хивс хивсэнцрийг солиход 1,17 сая амдоллар зарцуулжээ. Гэвч Трампыг эсэргүүцэгчид болоод зарим блогеруудын бичсэнээр Цагаан ордны засвар шинэчлэлийн ажил нь Трампын зочид буудал казиногийн тохижилтыг өөрийн эрхгүй санагдуулж байна хэмээн бичиж буй юм.

Эх сурвалж: www.assa.mn

Төстэй мэдээллүүд

Дональд Трамп твиттерээс гарах бодолгүй гэдгээ зарлажээ

2017/08/02, 13:13

Энтони Скарамуччиг ажлаас нь халжээ

2017/08/01, 15:38

АНУ ОХУ-ын эсрэг хориг арга хэмжээг эхлүүлэх үү?

2017/07/27, 11:17

Д.Трамп Цагаан ордны сэтгүүлчдийн оройн зоог барих арга хэмжээнд оролцохгүй

2017/02/26, 11:41

Сэтгэгдэл

АНХААРУУЛГА: Уншигчдын бичсэн сэтгэгдэлд www.CHUHAM.mn хариуцлага хүлээхгүй болно. ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Сэтгэгдэлтэй холбоотой санал гомдлыг 7711-0505 утсаар хүлээн авна.