Энэ оны эхний 7 сарын байдлаар манай улс экспортод 4.116.7 сая ам.долларын бараа, түүхий эд гаргаж, 3.265.7 сая ам.долларын бараа, түүхий эд импортоор авчээ.

УУХҮЯ-ны мэдээллээр өнгөрсөн оны мөн үетэй харьцуулахад экспорт 596.4 сая ам.доллараар буюу 16.9 хувиар, импорт 929.0 сая ам.доллараар буюу 39.8 хувиар өсөөд байна. Экпорт, импортын зөрүү 851.0 сая ам.долларын эерэг үзүүлэлттэй гарчээ. Экспортод боловсруулаагүй нефть, төмрийн хүдэр болон цайрын баяжмалыг 100 хувь, зэсийн баяжмалын 99.8 хувийг БНХАУ-д, жоншны 53.7 хувийн мөн урд хөршид, 46.0 хувийг ОХУ-д, боловсруулаагүй буюу хагас боловсруулсан алтыг 100 хувь Их Британид тус тус гаргасан байна. Манай улс дэлхийн 60 оронд бараа экспортлосноос БНХАУ-д 92.3 хувь, Их Британид 3.8 хувь, ОХУ-д 1.2 хувь тус тус ногдож, нийт экспортын 97.3 хувийг дээрх орнууд эзэлж байна.

Харин импортоор нийлүүлсэн барааны нийт дүнд машин механизм, тоног төхөөрөмж болон эд анги, цахилгаан хэрэгсэл, тэдгээрийн сэлбэг 683.6 сая ам.доллар буюу 20.9 хувь, эрдэс бүтээгдэхүүн 730.4 сая ам.доллар буюу 22.4 хувийг эзэлж байна. Үүний дотор нефтийн бүтээгдэхүүн 604.0 сая ам.доллар буюу 82.7 хувь, үндсэн төмөрлөг болон түүгээр хийсэн бүтээгдэхүүн 318.9 сая ам.доллар буюу 9.8 хувийг, химийн болон үйлдвэрийн бүтээгдэхүүн 205.1 сая ам.доллар буюу 6.3 хувийг тус тус эзэлж байна. Нийтдээ гадаад худалдааны бараа эргэлт 7.382.3 сая ам.долларт хүрснийг өнгөрсөн оны үетэй харьцуулвал 1.525.3 сая ам.доллараар буюу 26.0 хувиар өссөн дүнтэй гарчээ.