Европын Холбооноос Монгол Улсад 37.5 сая евро олгоно

Бичсэн:nomun
2020/07/22/, 09:13

Гадаад харилцааны сайд Н.Энхтайван Европын Холбооноос Монгол Улсад суугаа Элчин сайд Траян Христеаг хүлээн авч уулзав.

Уулзалтын эхэнд Элчин сайд Траян Христеа Монгол Улсын Гадаад харилцааны сайдаар томилогдсонд баяр хүргээд, хоёр талын харилцаа хамтын ажиллагааг цаашид өргөжүүлэн хөгжүүлэхэд Европын Холбооны талаас бүхий л талаар хамтран ажиллахаа илэрхийлэв.

Тэрбээр Монгол Улсыг Европын Холбооны санхүүгийн тогтолцоонд аюул занал учруулах, мөнгө угаах, терроризмыг санхүүжүүлэхтэй тэмцэх стратегийн дутагдалтай өндөр эрсдэл бүхий гуравдагч улсын жагсаалтад оруулсан нь хоёр талын харилцаанд, тэр дундаа хөгжлийн хамтын ажиллагаанд нөлөөлөхгүйг нотлоод, Европын Холбооноос Монгол Улсад шинэ коронавируст цар тахалтай тэмцэхэд зориулан 37.5 сая еврог богино, дунд, урт хугацааны төслүүдээр дамжуулан олгох болсныг тэмдэглэв.

Н.Энхтайван сайд дэлхий нийтээр тархаад буй шинэ коронавируст цар тахлын үед Европын Холбооноос Монгол Улсад тусламж олгож байгаад талархал илэрхийлээд Европын Холбооны гишүүн улсуудад сурч, ажиллаж амьдарч буй монгол иргэдийн эрх ашгийг хамгаалах, тусалж дэмжихийг Элчин сайдаас хүсэв.

Гадаад харилцааны сайд Монгол Улс, Европын Холбооны харилцаа, хамтын ажиллагааг эдийн засаг, худалдаа, хөрөнгө оруулалтыг нэмэгдүүлэхэд анхаарч ажиллахаа дурдаад, Европын Холбооны тарифын хөнгөлөлттэй системийг бүрэн ашиглах хүрээнд Монгол Улсаас Европын Холбооны стандарт, шаардлагад нийцсэн бараа, хүнсний бүтээгдэхүүний үйлдвэр байгуулах санал тавьсныг Элчин сайд судалж үзэхээ илэрхийлэв.

Төстэй мэдээллүүд

Гадаад харилцааны сайд Н.Энхтайван БНСУ-ын Элчин сайд Ли Ё Хуныг хүлээн авч уулзлаа

2020/07/20, 16:42

Европын холбооноос улсын төсөвт 50,8 сая еврогийн дэмжлэг үзүүллээ

2020/05/29, 17:10

Зам, тээврийн хөгжлийн сайд Я.Содбаатар Европын холбооны гишүүн улсуудаас монгол улсад

2018/11/30, 12:52

Монгол Улсын Ерөнхийлөгч Х.Баттулга Европын Холбооноос Монгол Улсад суугаа Элчин сайдыг

2017/07/11, 12:58

Сэтгэгдэл

АНХААРУУЛГА: Уншигчдын бичсэн сэтгэгдэлд www.CHUHAM.mn хариуцлага хүлээхгүй болно. ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Сэтгэгдэлтэй холбоотой санал гомдлыг 7711-0505 утсаар хүлээн авна.