Сонгуулиас өмнө вакцин гаргаж авахаар Трамп яарч байна

Бичсэн:nomun
2020/09/10/, 09:21

Цар тахлыг зогсоох ганц итгэл найдвар нь одоогоор вакцин болоод байна. Тэгвэл коронавирусын эсрэг вакциныг үйлдвэрлэхээр туршиж буй есөн компани олон нийтийн эрүүл мэндийн аюулгүй байдлыг хангасан вакцин үйлдвэрлэж, Засгийн газар нь зөвшөөрөл олгохоос өмнө олноор үйлдвэрлэхгүй гэсэн амлалтад гарын үсэг зурлаа. "Бид ёс зүйн өндөр хэм хэмжээг баримталж, шинжлэх ухааны үндэслэлтэй вакциныг үйлдвэрлэх болно” гэсэн амлалтын гэрээнд "AstraZeneca”, "BioNTech”, "Moderna”, "Pfizer”, "Novavax”, "Sanofi”, "GlaxoSmithKline”, "Johnson & Johnson”, "Merck” гэсэн есөн компанийн төлөөлөл гарын үсэг зуржээ. Эдгээрээс "Pfizer” болон "Moderna” компани сүүлийн шатны туршилтаа АНУ-д хийж байгаа бол "Johnson & Johnson” компани нэгдүгээр шатны туршилтаа эхлүүлэхээр бэлтгэж байна. Түүнчлэн энэ амлалтыг түүхэн, өмнө нь болж байгаагүй онцгой үйл явдал хэмээн үзэж байгаа талаараа "Pfizer” компанийн гүйцэтгэх захирал Альберт Боурла "NBC” телевизийн нэвтрүүлэгт оролцох үеэрээ ярьжээ.

Энэ гэрээний өмнөхөн АНУ-ын ерөнхийлөгч Дональд Трамп "Арваннэгдүгээр сард болох сонгууль бидний хувьд маш чухал үйл явдал. Тиймээс энэ онцгой өдрөөс өмнө вакцинаа гаргаж авахаар ажиллаж байна. Энэ хугацаандаа багтаан вакцин бэлэн болно гэсэн итгэл дүүрэн байна” хэмээн даваа гаригт мэдээлсэн юм.

Гэвч энэ мэдэгдэл нь тархалтаараа дэлхийд тэргүүлж байгаа АНУ сонгуулиас өмнө вакцинаа гаргахын тулд яаравчлан туршилтыг нь дуусаагүй байхад үйлдвэрлэх вий гэсэн айдсыг бий болгоод байна. Учир нь АНУ-ын Хүнс, эмийн удирдах газрын комиссар Стивен "Financial Times” сонинд өгсөн ярилцлагандаа "Гуравдугаар шатны туршилт дуусахаас өмнө вакциныг яаралтай ашиглах зөвшөөрөл олгох талаар хэлэлцэнэ” хэмээн ярьж байв. Гэвч амлалтын гэрээнд "Гуравдугаар шатны туршилтаар аюулгүй, үр дүн сайтай гэдэг нь нотлогдсон тохиолдолд яаралтайгаар ашиглах зөвшөөрөл олгоно” хэмээн тусгасан юм.

ЗУРГААГААС ОЛОН ХҮН НЭГ ДОР ЦУГЛАРВАЛ ТОРГОНО

Их Британид коронавирусын тохиолдол нэмэгдэж буйтай холбогдуулан ирэх даваа гаригаас нэг дор зургаагаас олон хүн цуглахыг хууль бус хэмээн үзнэ хэмээн мэдэгдлээ. Энэ шинэ хууль олон нийтийг хамарсан уулзалт төдийгүй гадаа, дотор, гэр, нийтийн эзэмшлийн талбай, паб, зоогийн газарт хэрэгжинэ. Харин сургууль, албан байгууллага, хурим, оршуулгын ёслол, багийн спортын гишүүдэд хамаарахгүй аж. Хэрэв хуулийг нэг удаа зөрчвөл 100 еврогоор, дахин зөрчвөл хамгийн дээд тал нь 3200 еврогоор торгох юм. Тус улсын Ерөнхий сайд Борис Жонсон "Вирусын тархалтыг хязгаарлахын тулд бид яаралтай хариу арга хэмжээ авах шаардлагатай байна. Тиймээс нэг дор олон хүн цугларахыг хориглож байгаа учир цагдаагийн тавьсан шаардлагыг биелүүлэхийг хүсье. Хэрэв танд шинж тэмдэг илэрвэл шинжилгээ өгч, бусдаас өөрийгөө тусгаарлаж, маск зүүж, гараа тогтмол угаах нь чухал юм” гэжээ. Өчигдрийн байдлаар Их Британид 350 гаруй мянган хүн халдвар авч, 40 гаруй мянган хүн нас бараад байна.

Б.Должинжав

Эх сурвалж: "Зууны мэдээ” сонин

Төстэй мэдээллүүд

Япон коронавирусний вакцин худалдан авахад 6.3 тэрбум ам.долларыг зарцуулна

2020/09/09, 11:10

Доналд Трамп сонгуулиас өмнө урьдчилан сэргийлэх тариа гаргаж авахыг хүсчээ

2020/08/24, 17:39

ОХУ коронавирусний вакцинаа үйлдвэрлэж эхэллээ

2020/08/17, 10:49

Их Британичууд коронавирусийн эсрэг вакцин гарган авахын тулд бүх зүйлийг хийнэ

2020/04/22, 17:02

Сэтгэгдэл

АНХААРУУЛГА: Уншигчдын бичсэн сэтгэгдэлд www.CHUHAM.mn хариуцлага хүлээхгүй болно. ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Сэтгэгдэлтэй холбоотой санал гомдлыг 7711-0505 утсаар хүлээн авна.