АВТО ХУДАЛДАА ЭРХЛЭГЧИД ХЭДИЙ БОЛТОЛ ТӨРИЙН БОДЛОГЫГ ЭСЭРГҮҮЦЭХ ВЭ

Бичсэн:munkhbat
2017/08/24/, 10:23

Нийслэлийн өмнөх удирдлагуудын үед хийж, хэрэгжүүлсэн ажлуудаас хамгийн их хэл ам дагуулсан ажил бол Авто худалдааны цогцолбор билээ. Бүтэн дөрөв, таван жил үргэлжилсэн ч бүрэн ашиглалтад ороогүй байгаа энэ газрын хувь заяа хаашаа эргэх вэ гэдэг нь одоо ч хүлээлт үүсгэсэн хэвээр байна.

Анхны тооцооллоор бол аль хоёр жилийн өмнө "Да хүрээ” захыг бүрэн нүүлгэж, дуусаад Сонгинохайрхан дүүргийн нутаг дэвсгэрт баригдсан "Авто худалдааны цогцолбор” бүрэн ашиглалтад орсон байх ёстой байлаа. Гэтэл авто худалдаа эрхлэгчид нүүхгүй хэмээн зөрүүдэлж, байдлыг ийнхүү хүндрүүлсэн билээ.

Энэ томоохон бүтээн байгуулалтын ажилд нийт 20 тэрбум төгрөг зарцуулсан. Гэвч авто машин, сэлбэгийн худалдаа эрхлэгчид байгаль орчны асуудлаас болж нүүхгүй хэмээн гэдийж суусаар төсвийн 20 тэрбум төгрөгийг өнөөдөр үргүй зардал болгоход хүргээд байна. Үнэндээ авто худалдаа эрхлэгчид байгаль орчны асуудлаас илүүтэй нэгэнт байр сууриа олчихсон, үйлчлүүлэгч хэрэглэгчдээ татсан энэ газраасаа холдохыг хүсээгүй. Тэд хотоос гараад явчихвал ашиг орлого нь муудна гэсэн ганцхан асуудлаас болж ийнхүү уллаж байгаа.

Тэгвэл байгаль орчны чиглэлээр үйл ажиллагаа явуулдаг төрийн болон төрийн бус байгууллагуудын гаргасан судалгаагаар Да хүрээ зах орчимд 20 шахам жил авто худалдааны үйл ажиллагаа явуулсанаас болж энэ газрын ойр орчимд агаар, хөрсний бохирдол нийслэлийн бусад цэгүүдээс хамгийн их байгаа нь тогтоогдсон. Тэр дундаа хүний биед огт байх ёсгүй хар тугалга тус зах орчимд амьдардаг хүүхдийн цуснаас илрэх болсон. Энэ бол хойч үедээ заналхийлсэн ноцтой хэрэг мөн.

Албаны хүний хэлсэнээр "Да хүрээ” орчимд 60 орчим авто үйлчилгээ, улгаалга, дугуй засварын газар байдаг аж. Тэдгээр авто үйлчилгээний газруудын хог хаягдал, тос масло хаашаа орох билээ. Хөрсөнд л шингэж таарна шүү дээ. Тэгээд байнга машин асааж, унтраана. Тэр хэрээрээ агаарын бохирдол нь ч нэмэгдэнэ. Хамгийн гол нь "Да хүрээ” захыг тойроод Баянзүрх дүүргийн 2-3 хорооны иргэд амьдарч байгаа. Нийслэлийн нэг хороо 8-10 мянган хүнтэй гэж тооцвол тэр хавьд 30 орчим мянган хүн амьдарч байна. Эдгээр хүмүүсийн эрүүл мэнд ноцтой хохирно гэсэн үг. Иймээс л хот төлөвлөлт гэдэг зүйлийг хийсэн шиг хийж, гаргах ёстой бол гаргах л ёстой гэдэг байр суурийг иргэд илэрхийлэх болсон.

Тэгэхээр нэгэнт асар их хэмжээний мөнгө зарцуулаад бариад байгуулчихсан энэ ажлыг одоо хэрэгжүүлэх л үлдээд байна. Өнгөрсөн долоо хоногт бүрэн ашиглалтад орсон уг цогцолборт авто худалдаа эрхлэгчид нүүж очиход л асуудал цэгцэрнэ. Мэдээж хэрэг авто худалдаа эрхлэгчид бизнесийн ашиг орлогоо бодож буй нь ойлгомжтой. Эхний ээлжинд үйлчлүүлэгчгүй тав тухгүй байх ч цаашид шат дараатай ажлуудыг авч хэрэгжүүлсэнээр хот дотор нэгэнт авто худалдаа байхгүй болчихвол иргэд хүссэн хүсээгүй тэр газрыг зорихоос өөр сонголтгүй болно. Ингэж явсаар хэсэг хугацааны дараа үйл ажиллагаа нь жигдэрнэ.
Дашрамд дуулгахад, авто худалдаа эрхлэгч бүх иргэд цогцолборыг дэмжихгүй байгаа хэрэг биш юм. Өнгөрсөн даваа гарагт төр засгийн бодлогоор хэрэгжүүлсэн ажлыг дэмжиж хөрөнгө оруулсан иргэд өнөөдөр ихээхэн алдагдалд орсон хэмээн мэдээлэл хийсэн билээ.

Тодруулбал Хотын баруун захад байрлах "Авто худалдааны цогцолбор”-т 10 тэрбум төгрөгийн хөрөнгө оруулалт хийсэн иргэд тэмцлийн хурц хэлбэрт шилжихээ өнөөдөр мэдэгдлээ. Хэвлэлийн бага хурлын үеэр тэдгээр иргэдийн төлөөлөл хэлэхдээ " өнөөдрийг хүртэл Улаанбаатар дахь нэг ч авто захын үйл ажиллагааг зогсоож, нүүлгэн шилжүүлээгүй байгаа нь тус цогцолборын нээлт зүгээр нэг шоу болоод өндөрлөхвий гэсэн сэтгэгдэл хөрөнгө оруулсан 2,000 гаруй иргэнд төрүүлж байна.Зам Тээвэр Хөгжлийн яам болон Нийслэлийн хамтарсан ажлын хэсгээс гарсан дүгнэлт шийдвэрээ холбогдох агентлагууд нь мөрдөж ажиллах байх гэж найдаж байна. Хэрэв тус цогцолборт, авто захуудаа нэгтгэх талаар Нийслэлийн засаг дарга С.Батболд болон ажлын хэсгийн ахлагч засаг даргын орлогч П.Баярхүү нар дорвитой шийдвэр гаргахгүй бол бид дараагийн тэмцлийн хурц хэлбэрийг сонгохоос өөр аргагүй гэдгээ мэдэгдэж байна" гэв.

Энэхүү мэдээллийн дараа нийслэлийн удирдлагууд авто захуудыг ирэх сард хотоос гаргаж дуусна хэмээн мэдэгдсэн. Харин өчигдөр авто худалдаа эрхлэгчдийн төлөөлөл хотоос хэзээ ч нүүхгүй гэх хатуухан мэдэгдлийг хийсэн. Ямартай ч талууд өөр өөрсдийн байр суурийг ийнхүү илрэхийллээ. Харин цаашид байдал яаж эргэхийг харж суух л үлдээд байна. Улсын төсвийн 20 тэрбумаар барьсан бүтээн байгуулалт цаашид эзэнгүй хэвээр байх уу, нийслэл хотын төвд авто худалдаа эрхлэгчид үйл ажиллагаагаа явуулсаар, хөрсний бохирдлыг улам бүр нэмсээр байх уу.

Б.Сансар

olloo.mn

Төстэй мэдээллүүд

Э.Бат-Үүл эсэргүүцэгчдийнхээ цувааг зогсоож чадах уу

2015/11/27, 11:33

Томоохон авто машины худалдааны захуудад шалгалт хийж байна

2015/10/30, 09:49

Ил задгай машин худалдааг 10 сарын 1-ний дотор зогсооно

2015/09/22, 11:46

“Авто худалдааны цогцолбор”-ын 6,8 га газар дуудлага худалдаагаар 3,3 тэрбум төгрөгт

2015/03/06, 10:30

Сэтгэгдэл

АНХААРУУЛГА: Уншигчдын бичсэн сэтгэгдэлд www.CHUHAM.mn хариуцлага хүлээхгүй болно. ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Сэтгэгдэлтэй холбоотой санал гомдлыг 7711-0505 утсаар хүлээн авна.