Дэлхий хүн амын 40 гаруй хувь нь усны бохирдолтой сав газруудаар амьдарч, энэ нь цаашдаа улам өсч, ус гамшгийн байдалд орох магадлалтай гэсэн үзүүлэлтийг ЭЗХАХБ байгууллагаас гаргажээ. Усны бохирдлоос болж хүнсний аюулгүй байдал алдагдах, экосистем ундны усны хангамж муудах үр дагавартай. Тэгвэл манайханд усны бохирдолтой гол мөрнөөс ууж, малаа усалж эрүүл мэндээрээ хохирч байгаа өчнөөн асуудал бий.

Монгол Улсын Ерөнхийлөгчийн Усны бодлогын зөвлөх Ц.Сосорбарам "Ус бол онцгой обьект, онцгой эрдэс. Бусад орнуудад усаа онцгой анхаардаг юм байна. Жишээ нь АНУ-д усаа 282 жилийн өмнө Ерөнхийлөгчийн мэдэлд авсан байна. Тийм учраас олон улсад усны хуулиуд зөндөө, харин усны засаглал нь өөр өөр байдаг. Усны асуудлаа шийдэж байж улс орон хөгжинө гэдэг ч ус манай дэлхий дээр нэн чухал одоо дутагдаж байгаа хөрөнгө шаардсан монополь тулгарсан асуудлын нэг. Усны бодлого нь нийгэмд ядуурлыг бууруулах болон бүс нутгийн хөгжил эрчим хүч, хөдөө аж ахуй, байгаль орчин, эрүүл мэндийн асуудлуудтай холбоотой байдаг” гэлээ.  

Манайд 500 гаруй уул уурхайн компани бий. Цөөхөн том ордууд гүний ус ашиглаж байгаа бол олонхи нь гол мөрөнд алт угааж  усыг нь угаадас болгож бохирдуулж байгаа нь үнэн.

Алтанд шунасан иргэд алт гэж эрдэнэсийг авахын тулд улайрч байгаа ард иргэд Монголын үзэсгэлэнт газруудын голыг улаан хоормог болгон хаяж байгаа нь хамгийн эмгэнэлтэй дүр зураг харагдана. Ямар ч нөхөн сэргээлт хийхгүйгээр голын голдрилыг өөрчилж, байгаль дэлхийгээ сүйтгэж, усыг улаанаар эргүүлэн "уйлуулж” хаяад эргэж харалгүй явдагт үнэхээр харамсдаг юм. Сүйтгэх сүйтгэхдээ бүр Монголын хамгийн сайхан үзэсгэлэнтэй газруудыг сүйтгэдэг. Жишээлбэл, Архангайн Цэнхэрийн голыг улаан хоормог болгосон түүх бий. Мөн Сэлэнгийн Ерөө, Хараагийн эхийг, Төв аймгийн Заамарыг гамшиг болгож хаясан. Эдгээр газруудад урт нэртэй хуулийн нэр барьж хулгайгаар лиценз олгосон уул уурхай компаниудын эзэн болох эрх бүхий хүмүүс, нинжа хатуу хариуцлага тооцох ёстой. Хэдэн төгрөгөөр торгоод өнгөрөх нь биш, хуулийн хатуу хариуцлага тооцож нөхөн сэргээлтээр цэнгэг усаа, цэвэр орчноо нэхэж, хийлгүүлж хэрэгжүүлдэг байх ёстой. Ер нь бол учир мэдэх хүмүүс алтны тухайд үндсэн ордыг ашиглаж болно. Харин шороон ордыг хязгаарлах хэрэгтэй гэдэг юм билээ. Алт олж, баяжиж хөрөнгөжиж хүнээс илүү амьдарч болно. Харин үр хүүхдүүд минь хожим хийсэн хорыг чинь хүртэж, алт урсгаж ус олох аюулд хүрвэл яах вэ.  Өнөөдөр цэвэр усаа хайр гамгүй урсгаж, бузарлаж хүссэнээ авч болно, хожим бид балга ус уухын тулд алт урсгаж чадах уу.

Магадгүй өнөөдөр танд ус үнэгүй, өнгөгүй, үнэ цэнэгүй мэт санагдаж байхыг үгүйсгэхгүй. Өнөөдөр 1 литрийг нь 3 төгрөгөөр үнэлж авдаг мөнгө ч юу ч биш мэт санагдаж болно. Гэхдээ хэдхэн жилийн дараа та цэвэр ч ус уух, бохирч ус хэрэглэх боломжгүй болох вий дээ. Усаа гаднаас импортоор оруулж ирдэг цаг үед бидний үр хүүхэд амьдрах вий дээ гэхээс айж бас эмзэглэж байна. Тиймээс усаа хайрлах, хамгаалах, хэмнэх ухамсар сэтгэлгээ иргэн таны, ирээдүйн хүүхэд багачуудын тархины багтаамж, сэтгэлийн орон зайд чинь бий шүү.