Аливаа улс оронд Элчин сайдаа илгээнэ гэдэг манай улсын хувьд асуудал болоод байгаа.  Энэ албан тушаалыг үеэ өнгөрөөсөн улстөрчдөд хуваарладаг, хэн нэгэн эрхэмд шагнал болгож өгдөг, эсвэл хамаатан саднаа томилдог хэргэм зэрэг гэх ойлголт бий болсон.  Энэ нь ч үнэний ортой.  Өнгөрсөн хугацаанд Элчин сайд нарын томилгоо тойрсон асуудал улс төрийн хүрээнд нэлээд яригдав.  Сүүлийн хоёр жилийн хугацаанд Элчин сайд, төлөөлөлгүй байгаа улс орон ч байна.   Тухайн улс орнуудад шинээр томилогдох Элчин сайд нарыг Засгийн газар болон Ерөнхийлөгчөөс нэр дэвшүүлж, УИХ баталдаг. Эцэст нь Ерөнхийлөгч итгэмжлэх жуух бичгийг нь өгснөөр Элчин сайд томилогддог.  Гэсэн ч энэ суудлын ард ямар  нэгэн  ашиг сонирхол ямагт байж ирсэн учраас  томилгоо хаа нэгтэй гацаж ирсэн.   Харин өнгөрсөн долоо хоногт Ерөнхийлөгч  Х.Баттулга  гурван улсын Элчин сайдад итгэмжлэх жуух бичгийг нь гардууллаа.  Швед, Канад, Их Британи Умард Ирландын нэгдсэн вант улсад суух Элчин сайдыг томилж, чилтэл хүлээлгэсэн энэ асуудал нэг юм гацаанаас гарав.  Одоо цаана нь дахиад хэдэн улсын Элчин сайдын суудал хоосон байгаа.  Ерөнхийлөгчийн зүгээс хориг тавьж буцаасан асуудал ч бий.   Ерөнхийлөгч "Элчин сайдаар ажиллахаар болсон нэр дэвшигчид нь тухайн албыг хаших насны шалгуурыг хангаагүй, тэднийг томилохдоо төрийн албаны мерит зарчмыг зөрчсөн болон Монгол Улсын чухал "гуравдагч хөрш” орнуудад суух Элчин сайдын өндөр хариуцлагатай албыг зохих төвшинд хашиж чадахгүй гэж үзэж байгаа зэргийг харгалзан тэднийг тохоон томилох тухай зарлиг болон Итгэмжлэх жуух бичгийг гаргах боломжгүй байна” хэмээн  буцаасан асуудал бий.  Ямартай ч  Ерөнхийлөгчийн шалгуурыг давж, өнгөрсөн долоо хоногт Элчид сайдаар томилогдсон гурван эрхэмтэй танилцана уу.