Тариалангийн бүс нутгаар хүйтрэхийг анхааруулж байна

Бичсэн:munkhbat
2015/09/26/, 18:29

Улс орон даяар ургац хураалтын ажил эрчимтэй явагдаж, өнөөдрийн байдлаар 92.9 мянган га-гаас 78.9 мянган тонн үр тариа, 7.1 мянган га-гаас 80.1 мянган тонн төмс, 3.8 мянган га-гаас 40.7 мянган тонн хүнсний ногоо, 8.4 мянган га-гаас 10.7 мянган тонн тэжээлийн ургамал тус тус хураан авснаар үр тарианы хураалт 31.3 хувьтай, төмс, хүнсний ногооны хураалт 58.9 хувьтай явж байна.

Төмс, хүнсний ногооны хураалт өнгөрсөн оны мөн үеийн түвшинд явагдаж байгаа бол тарианы болцтой холбоотойгоор үр тарианы хураалт бага зэрэг удаашралтай явагдаж байна. Ургац хураалтын ажилд 1200 гаруй цэргийн албан хаагч, 750 оюутан залуучууд гэрээгээр ажиллаж байна.

Энэ сарын 23-24-ний өдрүүдэд тариалангийн бүс нутгаар хур тундас, уулархаг нутгуудаар цас орсны улмаас өнөөдрийн байдлаар ургац хураалтын ажил түр зогсоод байна. Орон нутгаас ирж байгаа мэдээллээр Төв аймгийн Угтаалцайдам суманд 600 га талбайн ургац мөндөрт өртсөн, Булган аймгийн Сэлэнгэ сум, Дархан-Уул аймгийн Шарын гол, Төв аймгийн Цээл сум орчмоор талдаа 5 см хүртэл цасан бүрхүүл тогтож хайлсан мэдээтэй байна.

Энэ жилийн хувьд 9 дүгээр сард цаг агаар тогтворгүй, хур тундас ихтэй байгаагаас үр тарианы ургацын хаягдал нэмэгдэх магадлалтай байна. Тиймээс тариаланчид цаг агаарын төлөв байдалтай уялдуулан хураалтын уян хатан арга технологийг сонгож аль болох хаягдал багатайгаар ургац хураалтын ажлыг шуурхайлах шаардлагатай байна.

Ус цаг уур, орчины шинжилгээний газраас ирүүлсэн мэдээгээр энэ сарын 26, 29-нд тариалангийн бүс нутгаар хур тунадас, нойтон цас орж салхи ихтэй байхын зэрэгцээ шөнөдөө 0-5 градус хүрч хүйтрэх төлөвтэй байгаа тул ургацыг хөлдөж хайрагдахаас хамгаалах арга хэмжээг авч хэрэгжүүлэх нь зүйтэй.

Улмаар энэ сарын 29-30-нд нийт нутгаар бороо, нойтон цас орж хүйтрэх төлөвтэй байгааг орон нутгийн удирдлагууд, аж ахуйн нэгжийн захирал болон тариаланчдад анхааруулж холбогдох арга хэмжээг шуурхай авч хэрэгжүүлэх хэрэгтэй.

Төстэй мэдээллүүд

Ургац хураалт 30 гаруй хувьтай байна

2015/09/24, 17:55

Аймгийнхаа төмсний хэрэгцээний 44 хувийг дотоодоос хангана

2015/09/15, 10:40

Монгол эрдэмтэд үр тарианы 100 орчим сорт гаргажээ

2015/04/21, 10:29

300 мянган га талбайгаас 465.7 мянган тонн буудай хурааж авах төлөвлөгөөтэй

2015/04/07, 14:16

Сэтгэгдэл

АНХААРУУЛГА: Уншигчдын бичсэн сэтгэгдэлд www.CHUHAM.mn хариуцлага хүлээхгүй болно. ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Сэтгэгдэлтэй холбоотой санал гомдлыг 7711-0505 утсаар хүлээн авна.