Хятадын санхүүгийн зах зээлийн савлагаа тогтворжиж, аж үйлдвэрийн салбарынх нь эрэлт нэмэгдсэнээр голлох металл болох зэс, алтны ханш долоо хоногийн өмнөөс сэргэж эхэллээ. Тодруулбал, зэсийн ханш өнгөрсөн даваа гарагг 1.6 хувиар өсч, тонн нь 4659 ам.долларт хүрэв. "Goldman Sachs”-ын шинжээчид "Зэсийн ханшийн энэхүү сэргэлт нь богино хугацаанд эдийн засагт эерэг нөлөө үзүүлнэ” хэмээв. Олон улсын зах зээод зэсийн илүүдэл энэ жил 665 мянган тоннд хүрнэ хэмээн таамаглаж байгаа бөгөөд 2018 он хүртэл ханш дорвитой сэргэхгүйг дурдлаа. Лхагва гарагийн хаалтын ханшаар Лондоны металлын биржид тонн зэс 4696 ам.доллартай тэнцэж байна.

 

Харин алтны хувьд ханш нь өсөх төлөвтэй байгаа аж. Өнгөрсөн оны арванхоёрдугаар сард унци нь 1055 ам.доллар болтлоо унаад байсан алтны ханшид он гарсаар өсөлт ажиглагдаж эхэллээ. Тодруулбал, унци алт нэгдүгээр сарын сүүлчээр 1124 ам.доллар хүрч, хоёрдугаар сарын 11-нд 1247 ам.доллар буюу 2010 оны тавдугаар сараас хойших өдрийн өсөлтийн хамгийн өндөр түвшинд хүрэв. Өчигдрийн байдлаар унци алт 1235 ам.долларын ханштай байна. Шинжээчид унци алтны ханш ирэх саруудад 1300-1400 ам.доллар хүрнэ хэмээн таамаглаж байна.

 

Б.УУГАНБАЯР /ҮНДЭСНИЙ ШУУДАН/