Бичсэн:munkhbat
2016/10/04/, 11:40

Tweet

 

Монгол Улсын нийт хүн амын дөрөвний нэг нь нийслэлийн захын гэр хороололд амьдардаг. Захын гэр хороололд суурин газрын дэд бүтцийн хүртээмж сул,бохирыг цэвэрлэх тохиромжтой шийдэл байдаггүй учир нүхэн жорлон хүрээгээ тэлсээр байна. Үүнээс улбаалан халдварт өвчний тохиолдол ихэсч, хөрс, усны бохирдлын эрсдэл өндөр байгааг мэргэжилтнүүд хэлэх болсон Тэгвэл эдгээр асуудлыг шийдвэрлэх зорилгоор Монгол Улс, Азийн Хөгжлийн Банкны хооронд "Гэр хорооллын ариун цэврийн байгууламжийг сайжруулах замаар хөрсний бохирдлыг бууруулах” төсөл хэрэгжүүлэх буцалтгүй тусламжийн гэрээнд энэ сарын 30-нд гарын үсэг зурлаа.

Буцалтгүй тусламжийн хөрөнгөөр төвлөрсөн менежментийн сүлжээнд холбогдоогүй өрхийн ариун цэврийн байгууламжийг сайжруулан, бохир цэвэрлэх, зайлуулах, ариутган боловсруулах ажиллагааны циклийг иргэд олон нийт, хувийн хэвшил, иргэний нийгмийн байгууллагуудтай хамтран ажиллаж, бэхжүүлэх замаар орон нутгийн амьжиргааг дэмжих зорилготой юм.  Уг төслийг ирэх оны нэгдүгээр сараас 2020 оны арванхоёрдугаар сар хүртэл дөрвөн жилийн хугацаатай хэрэгжүүлнэ. Японы Ядуурлыг бууруулах сангаас төслийг санхүүжүүлэх бөгөөд нийтдээ гурван сая ам.доллар зарцуулахаар төлөвлөжээ.

Төслийн хүрээнд Чингэлтэй дүүргийн 12, 13 хороод болон Баянзүрх дүүргийн 27 дугаар хороонд 1500 экологид ээлтэй ариун цэврийн байгууламж суурилуулах юм.  Төсөл хэрэгжсэнээр гэр хорооллын ариун цэврийн байгууламжийг тэлэн өргөжүүлэх жишиг төсөл болохоос гадна хот суурин газрын дэд бүтцийн хөгжилд ихээхэн хувь нэмэр оруулна хэмээн албаныхан үзэж байгаа ажээ хэмээн БОАЖЯ-ны ХМА-наас мэдээллээ.