ОХУ-ыг юунаас болж заналхийлсэн нь тодорхойгүй байгаа ч Орос улс "Исламын улс” бүлэглэлийн эсрэг Сирид тусгай ажиллагаа явуулж, Сиритэй цэрэг армийн хүчийг нэмэгдүүлэхэд хамтрах талаар яриа хэлэлцээр хийсэн, АНУ, Орос хоёр хэт даврагчдын эсрэг хүч нэгтгэж байгаа зэргээс болж "исламын улсынхан” хорсож байгааг дэлхий дахин мэднэ.

ОХУ өнгөрсөн оны есдүгээр сарын сүүлчээс эхлэн Сири дэх "Исламын улс” хэт даврагч бүлэглэлийн эсрэг агаараас цохилт өгч эхэлсэн юм. Путин "Сирийн Ерөнхийлөгч Башар Аль-Ассад Оросд хандан цэргийн тусламж үзүүлэх хүсэлт тавьсан. Иймээс Сирийн Засгийн газар "Исламын улс” бүлэглэлтэй тэмцэхэд ОХУ-ын агаарын хүчин дэмжлэг үзүүлнэ. Гэхдээ Оросын арми зөвхөн агаарын цэргийн ажиллагаанд оролцоно. Газраар хийх байлдааны ажиллагаанд оролцохгүй” гэсэн билээ. АНУ тэргүүтэй Барууны орнууд Орос улс Сирид зэвсэг, техник нийлүүлж, цэргийн хүчээр тусалж байна, энэ нь хямралыг улам даамжруулна гэж үзэж байсан ч эцэст нь Обама, Путин нарын зөвшилцлөөр Сирид түр ч болов гал зогссон юм.

Түүнчлэн долоо хоногийн өмнө Францын Ерөнхийлөгч Франсуа Олланд улс оронд нт халдлага үйлдэх болсон "Исламын улс”-тай дайн зарлаж байгаагаа мэдэгдсэн. Тэрбээр "Исламын улс”-ын эсрэг хийж байгаа Оросын цэргийн ажиллагааг дэмжиж, Сирийн асуудлаар Орос, Ирантай хамтран ажиллах хэрэгтэйг хэлсэн билээ. Сирийн хурцадмал байдлыг тогтворжуулахын тулд Европын холбоо Орос, Иранаас гадна Персийн булангийн орнуудтай хамтрах хэрэгтэй гэж Олланд үздэг.

Ойрх Дорнодод бүхэлд нь аюул учруулж, дайн самуун, хямрал үүсгэсэн энэ бүлэглэлээс болж олон мянган хүн эх орноосоо дүрвэж, Европыг цагаачдын хямрал нөмрөхөд хүргэсэн "Исламын улс” бүлэглэлийг дарах талаар шинжээчид дараах арга замыг боловсруулсан байдаг.

-"Исламын улс” бүлэглэл сард ойролцоогоор 1000 орчим гадаадын иргэнийг бүлэглэлдээ элсүүлдэг гэсэн мэдээлэл бий. Тэдний дийлэнх нь исламын шашинтай хүмүүс байдаг аж. Хэрэв энэ урсгалыг хааж чадвал хэт даврагчдын хүчийг сулруулахад чухал үүрэгтэй.

-Энэ жил л гэхэд "Исламын улс”-ын үйл ажиллагааг дэмждэг 2000 орчим Твиттер хуудас нээгджээ. Үүнээс гадна тус бүлэглэл Твиттер хуудсыг суртал ухаалгын хэрэгсэл болгон ашиглаж, өөрсдийн бусармаг үйлдлийг сурталчилсаар байна. Иймд хэт даврагчдыг дэмждэг нийгмийн сүлжээний үйл ажиллагааг таслан зогсоох хэрэгтэй юм.

Түүнчлэн АНУ-ын Хойд Виржиниа дахь Имам Мохамед Магид зэрэг шашны зүтгэлтнүүдийн үйл ажиллагааг дэмжсэнээр исламын шашинт америк иргэдийг хэт даврагч бүлэглэлд нэгдэхээс сэргийлэх боломжтой.

-Гадаадын иргэд Турк улсаар дамжин Сири рүү нэвтэрч, улмаар хэт даврагчдын бүлэглэлд нэгдэж байгаа юм. Энэ сувгийг таслан зогсоохын тулд Ирак, Сири улсын хөрш орнууд болон Туркийн Засгийн газар, хууль хүчний байгууллагатай нягт хамтран ажиллах шаардлагатай гэв.

-Насанд хүрээгүй хүүхдүүдийг хэт даврагч бүлэглэлд онлайнаар уруу татах явдал гарсаар байгаа. Иймд исламын шашинт эцэг, эхчүүдэд энэ талаар дэлгэрэнгүй мэдээлэл өгч, тодорхой ойлголттой болгох хэрэгтэй гэж мэргэжилтнүүд үзэж байна.

-"Исламын улс” бүлэглэл стратегийн чухал ач холбогдолтой газруудыг эзэлж, үүнийхээ тусламжтай маш хурдан хөрөнгөжжээ. Өдгөө тэд хоёр тэрбум орчим ам.долларын хөрөнгөтэй гэсэн тооцоо байдаг. Өдөр ирэх тусам санхүүгийн эх үүсвэрээ зузаатгаж байгаа юм.

Иракийн Гадаад харилцааны зөвлөлийн гаргасан тайланд өгүүлснээр хэт даврагч бүлэглэл 2013 онд Мосул хотыг хяналтандаа авсны дараа орон нутгийн бизнес эрхлэгчдийг сүрдүүлэн сар бүр найман сая ам.долларыг бэлэн мөнгө болон татвар авах замаар бүрдүүлж байжээ. Түүнчлэн тус бүлэглэлийн хяналтаа тогтоосон бүс нутагт хүмүүнлэгийн тусламж үзүүлдэг олон улсын байгууллагуудыг айлган сүрдүүлж, тодорхой хэмжээний тусламж дэмжлэг авдаг байна. Эдгээр үзүүлэлт цаашид ч өсөн нэмэгдэх хандлагатай байгааг судлаачид онцолжээ.

-Бусад жихадист бүлэглэлээс илүү мафийн бүтэц, зохион байгуулалттай учир энэ бүлэглэл террорист үйл ажиллагааныхаа санхүүжилтийг хүн хулгайлах, томоохон хэмжээний дээрэм зохион байгуулах, мансууруулах бодис худалдаалах мөн хууль бусаар мөнгө угаах зэргээр бүрдүүлдэг аж.

Түүнчлэн "Нью-Йорк Таймс” сонинд бичсэнээр "Исламын улс” Сирийн удирдагч Башар Ассадын Засгийн газрыг буулгаж авахдаа Сирийн хойд хэсэгт орших цахилгаан станцыг өөрсдийн мэдэлд оруулж, цахилгаан, эрчим хүчийг төлбөртэйгээр түгээдэг болжээ. Мөн өнгөрсөн зургаадугаар сард Киркук хотын ойролцоох цахилгаан үйлдвэрлэх байгууламж, боловсруулах үйлдвэрт хяналтаа тогтоосон байна.