Бичсэн:munkhbat
2016/09/19/, 14:36

Tweet

 

Шайбтай хоккейн Дэлхийн цомын тэмцээн Канад улсын Торонто хотноо эхэллээ. Канадын цомын тэмцээний үргэлжлэл болон 1996 онд анх зохион байгуулагдаж байсан Дэлхийн цомын тэмцээн 3 дахь удаагаа зохион байгуулагдаж байгаа нь энэ ажээ. Өмнө нь 1996, 2004 онуудад зохион байгуулагдаж байсан Дэлхийн цомын тэмцээн 12 жилийн дараа эргэн ирлээ. Дэлхийн цомын тэмцээнд энэ цаг үеийн бүхий л шилдэг хоккейчид оролцож байгаа. Жил болгон зохион байгуулагддаг ДАШТ-д тэр бүр оролцоод байдаггүй шилдэг хоккейчид ч оролцож байгаа. ДАШТ нь ҮХЛ-тэй давхацдаг тул плэй-оффт шалгарсан багуудын тоглогчид шигшээ багтаа туслах боломж тэр бүр олдоод байдаггүй. Тэгвэл Дэлхийн цомын тэмцээн нь ҮХЛ-ийн өмнө зохион байгуулагдаж байгаа тул шилдэг хоккейчдыг нэг дор харах боломж олдож байна.

2016 оны Дэлхийн цомын тэмцээн энэ сарын 17-ны өдрөөс 10 сарын 1-ний хооронд зохион байгуулагдана. Тэмцээнд нийт 8 баг оролцож байгаа бөгөөд дэлхийн шайбтай хоккейн өнгийг тодорхойлж буй хоккейн их гүрнүүд оролцож байна. Мөн тэдэн дээр Европын нэгдсэн шигшээ болон Хойд Америкийн нэгдсэн шигшээ багууд оролцож байгаа.

Тэмцээний

• А хэсэгт: Канад, АНУ, Чех, Европын шигшээ
• В хэсэгт: ОХУ, Финланд, Швед, Хойд Америкийн шигшээ

Хэсгийн тоглолтууд Улаанбаатарын цагаар өнөө өглөө А хэсгийн тоглолтуудаар эхэлсэн бөгөөд энэ сарын 22 хүртэл үргэлжилнэ. Ингээд хэсгээсээ гарсан хэсэг тус бүрийн эхний 2 баг хасагдах шатанд өрсөлдөснөөр 10 сарын 1-нд аварга баг тодорно.

А хэсгийн эхний тоглолт:

• Европ 3-0 АНУ (гоол: 1-р үед М.Габорик, 2-р үед Л.Драйзайтль, П.Бельмар)
• Канад 6-0 Чех (гоол: 1-р үед С.Кросби, Б.Маршанд, П.Бергерон, 2-р үед Ж.Торнтон, Й.Тэйвс, 3-р үед А.Пьетранжело)

Өнөө шөнө В хэсгийн тоглолт ОХУ болон Шведийн шигшээ багуудын тоглолтоор эхэлнэ. Улаанбаатарын цагаар 03:00 цагаас ОХУ-Швед, 08:00 цагаас Финланд-Хойд Америкийн шигшээ багийн тоглолт болно.